BISDAK ko bai! GWAPA nga BISDAK =)

“ug nganong binisaya man uroy nang imong blog?”

mao’y ismid sa akong pinakakusgan nga hilaga. sa tuno sa iyang boses kulang nalang mo-ingon sya nga bangâ man nang binisaya oi.

“kay ngano diay kung binisaya beh?” gusto nako mahibaluan ang iyang rason.

“kung ininglis na dagha’y mobasa kay dagha’y makasabot” mao ang iyang tubag.

wala man ko nag blog aron daghan ang mobasa. ang akong pinakatumong ug tinguha sa pag blog mao nga dili malimtan ang mga importante panghitabo sa akong kinabuhi. alang-alang ug para kang yessa.

ug ang rason nganong ang pinulongan sa akong balangay ang akong gigamit? simple lang. nahagit ko. Bisaya ko’ng dako. BISDAK KO BAI!!! Gwapa nga BISDAK! ako kanang ipanghinambog sa tibuok kalibutan.

pagka lisud gayod mag blog sa binisaya. ilabi kay mas sayon mag ininglis, kay mao man ang gamit nga medium of instruction sa akong mga na-eskwelahan. lisud pa gyud mag-edit sa binisaya kay puros pulang badlis ang motunga sa mga pulong sa akong draft sa MS Word. labaw sa tanan, sayon kaayo mogaray ug sugilanon sa ininglis mao daghan ang matental sa paggamit niiini.

pero sagdi lang kung lisud. basta ang ako, nakasulat ko sa akong sugilanon. bahala ug wala’y mobasa sa akong blog. labina nga ako, di ko kabalo mobalak, ingon man mogaray ug sugilanon apan gapaningkamot ko. Gapaningkamot ko.

nisamot ko’g kahagit sa pagsulat sa binisaya sa dihang nabasa nako ang blog ni BATANG BISDAK. aduna siya’y post nga naghagit sa pagbalik sa atong balangay. Taas ni nga post busa nia ang pipila sa mga punto nga naka-tandug sa akong garbo:

Panahon na aron kita mosulat og mga sugilanon, balak, nobela, drama nga ipunting sa atong kaugalingong balangay. Panahon na nga kita mosulat sa atong kaugalingong pinulongan. Ang tigpaminaw sa atong balangay minilyon. Abton nato sila. Makiglambigit ta kanila kay mao kana ang atong kagikan.

Dinha pa lamang nga ang pagsulat mahimong arte sa pagpalingkawas kay giambitan ug nasabtan sa tibuok balangay.Atong itaod pagbalik ang ulo ug ang lawas sa atong balangay. Ato unang sulbaron ang pinahigdang siak. Human niana, sulbaron nato ang pinatindog nga siak nga ibase sa respeto ug pagsaulog sa mga nagkalain-laing panlantaw-sa-kalibotan ug pinulongan nga iya sa Pilipinas.

Mokat-on kita sa mga lumad ug sa mga makagagahom ug modernong magsusulat nga naggamit sa ilang kaugalingong panlantaw-sa- kalibotan ug pinulongan.

duaw pud mo sa iyang blog nga gitawag niya’g BISIBIS aron matilawan ninyo ang kalami sa pinulongang Bisaya. BATANG BISDAK, saludo ko nimu bai!